Úthlutun Uppbyggingarsjóðs til fyrirtækja í Grindavík

Uppbyggingarsjóður Suðurnesja hefur samþykkt styrki til 14 fyrirtækja í Grindavík fyrir samtals 48,5 milljónir króna.

Styrkirnir eru fjármagnaðir með viðbótarframlagi í Sóknaráætlun Suðurnesja samkvæmt samningi Innviðaráðuneytis og SSS en stuðningurinn er einkum ætlaður einyrkjum og smærri fyrirtækjum sem voru með starfsemi í Grindavík 10. nóvember 2023, eru í rekstri og hafa a.m.k. einn starfsmann á launaskrá og veltu undir 500 milljónum króna. Veittir eru styrkir til verkefna sem snúa m.a. að markaðssetningu, vöruþróun og nýsköpun. Styrkjum er hvorki ætlað að kaupa upp eignir né að greiða niður skuldir. 

Auglýst var eftir styrkumsóknum 7. júlí og var opið fyrir umsóknir til 18. ágúst.

Tilgangur Uppbyggingarsjóðs Suðurnesja er að styrkja menningar-, atvinnu- og nýsköpunarverkefni á Suðurnesjum.  Uppbyggingarsjóður Suðurnesja er samkeppnissjóður og auglýst er opinberlega eftir umsóknum og þær metnar út frá markmiðum og áherslum sem fram koma í Sóknaráætlun Suðurnesja.

Eftirtalin verkefni hlutu styrki:

Söluturninn Skeifan. Umsækjandi: Korca ehf.

Markmið verkefnisins er að aðlaga rekstur sjoppunnar að breyttum aðstæðum í Grindavík og uppfæra vöruframboð og markaðsaðgerðir með það að markmiði að ná betur til nýrra markhópa, þar á meðal til ferðafólks.

Verkefnið hlýtur styrk að fjárhæð kr. 2.500.000.

HemmGym. Umsækjandi: Hemmverk ehf.

Markmið verkefnisins er að færa Grindvíkingum heilsubætandi afþreyingu.

Gefa Grindavík flottustu líkamsrækt sem völ er á og bjóða fólki persónulega þjálfun í skemmtilegri líkamsrækt.

Verkefnið hlýtur styrk að fjárhæð kr. 4.000.000.

Markaðssókn. Umsækjandi: Northern Light á Íslandi ehf.

Helsta markmið verkefnisins er að snúa vörn í sókn og efla markaðsstarf, nýsköpun og vöruþróun til að gera markhópi félagsins grein fyrir því að óhætt er að dvelja í Svartsengi, þrátt fyrir jarðhræringar.

Að draga fram hversu vel svæðið er vaktað af færasta vísindafólki Íslands þar sem aldrei er gefinn afsláttur af öryggi gesta sem og starfsmanna.

Verkefnið hlýtur styrk að fjárhæð kr. 6.500.000.

Útrás íslenskra sæeyrna tengslamyndun & markaðssókn erlendis. Umsækjandi: Sæbýli rekstur ehf.

Markmiðið er að skapa varanleg viðskiptatengsl við lykilmarkaði utan Íslands fyrir íslensk sæeyru, með áherslu á hágæða hráefni til matvælaiðnaðar, skartgripagerðar og sérvöru, og þannig stuðla að auknum útflutningi og verðmætasköpun.

Verkefnið hlýtur styrk að fjárhæð kr. 4.000.000.

Markaðsetning Kristinsson. Umsækjandi: VK List ehf.

Stefnt er að auka sýnileika reksturs Kristinsson Handmade í Grindavík vegna breyttra aðstæðna. Auka flæði vegfarenda inn í verlsun.

Verkefnið hlýtur styrk að fjárhæð kr. 2.000.000.

Volcano Café og handverkshús – Hjólaleiga- VR fræðsla. Umsækjandi: Gistihúsgrindavík ehf.

Markmið verkefnisins er að fjölbreyta rekstri Gistihúss Grindavíkur með því að opna Volcano Café og handverkshús, þar sem saman fara þjónusta, upplifun og sköpun. Í rýminu verður kaffihús, hjólaleiga með bæði rafmagns- og hefðbundnum hjólum, persónuleg VR-upplifun og verslun með handverk og vörur frá heimamönnum. 

Verkefnið hlýtur styrk að fjárhæð kr. 6.500.000.

Hjá Höllu aftur heim. Umsækjandi: HALPAL slf.

Markmið verkefnisins er að endurheimta atvinnustarfsemi í Grindavík með opnun vinnslueldhúss fyrir Hjá Höllu. Eldhúsið mun styðja við rekstur í Smáralind og á Keflavíkurflugvelli, skapa fjögur störf í upphafi og leggja grunn að frekari endurreisn, atvinnuuppbyggingu og samfélagslegri virkni í Grindavík.

Verkefnið hlýtur styrk að fjárhæð kr. 3.100.000.

Frá grunni til heildarupplifunar. Umsækjandi: Hótel Grindavík ehf.

Verkefnið felur í sér mótun heildstæðrar framtíðarsýnar, markaðssetningar og efnisgerðar fyrir Hótel Grindavík og Brúna veitingastað. Áhersla er lögð á upplifun gesta, aðgengi fyrir alla, samþættingu sögulegs samhengis og undirbúning að frekari uppbyggingu og þróun fyrirtækisins.

Verkefnið hlýtur styrk að fjárhæð kr. 1.800.000.

Markaðsetning . Umsækjandi: Ragnheiður Þóra Ólafsdóttir

Markmið verkefnisins er að hefja starfssemi á ný í Grindavík á hárgreiðslustofu sem rekin hafði verið í rúm 30 ár þegar kom að rýmingu.

Verkefnið hlýtur styrk að fjárhæð kr. 800.000.

Uppbygging, markaðsetning sögu og ævintýraferða í Grindavík. Umsækjandi: Fjórhjólaævintýri ehf.

Markmiðið er að markaðssetja ævintýraferðirnar og þróa nýjar vörur þar sem stór hluti leiðakerfisins hefur farið undir hraun. Nauðsynlegt er að setja upp nýjar ferðir og markaðssetja þær til að tryggja rekstrarhæfni fyrirtækisins, varðveita þau störf sem fyrir eru og vonandi bæta við nýjum stöðum.

Verkefnið hlýtur styrk að fjárhæð kr. 6.000.000.

Styrking vörumerkis VIGT með markaðssetningu og vöruþróun. Umsækjandi: VIGT ehf.

Verkefnið felur í sér að bæta við nýrri hönnun, aðlaga vörur og söluleiðir að nýjum aðstæðum og efla markaðsstarf innanlands og erlendis. Með áframhaldandi þróun og styrkingu vörumerkisins VIGT, öflugu markaðsstarfi, nýjum umbúðum, endurnýjaðri heimasíðu og myndrænni efnissköpun verða vörurnar aðgengilegri og aðlaðandi fyrir bæði Íslendinga og erlenda gesti.

Verkefnið hlýtur styrk að fjárhæð kr. 5.000.000.

Endurmörkun á þjónustunni og gerð nýs kynningarefnis. Umsækjandi: Ingibjörg Jakobsdóttir

Verkefnið er nauðsynlegt til að tryggja áframhaldandi starfsemi Converted Water Tower. Reksturinn hefur dregist saman í kjölfar ytri aðstæðna og stendur nú á tímamótum. Með því að ráðast í nauðsynlegar aðgerðir– bæta við heilsutengdri þjónustu, endurnýja markaðsstarf og styrkja upplifun gesta– munum við skapa ný tækifæri.

Verkefnið hlýtur styrk að fjárhæð kr. 1.800.000.

Jarðhræringar við Grindavík. Umsækjandi: Fishhouse ehf.

Verkefnið snýr að Jarðhræringunum á Reykjanesi 2021-2025 og  opnun kvikmyndasýningar af atburðum við Grindavík í mynd og tali.

Verkefnið hlýtur styrk að fjárhæð kr. 1.500.000.

Vöruþróun | Sódavatn í glerflöskum. Umsækjandi: 22.10 ehf.

Markmið verkefnisins er að þróa nýja vörulínu af sódavatni í glerflöskum og auka þannig fjölbreytni í framleiðslu brugghússins og byggja undir nýja tekjustoð. Að kynna Suðurnes sem svæði þar sem nýsköpun og gæði í mat- og drykkjarframleiðslu eru í forgrunni.

Verkefnið hlýtur styrk að fjárhæð kr. 3.500.000.