Sóknaráætlun 2025-2029
Sóknaráætlanasamningar við átta landshlutasamtök sveitarfélaga voru undirritaðir þann 28. janúar 2025 en þeir gilda til fimm ára (2025-2029).
Framlög til Sóknaráætlunar Suðurnesja voru 103.259.936 kr. á árinu 2025.
Vinnustofa
Vinnustofa um Sóknaráætlun fyrir Suðurnes var haldin með hagsmunaaðilum á Suðurnesjum í Stapa í febrúar 2025 þar sem valin voru þau verkefni sem skulu vera í forgrunni á Suðurnesjum næstu fimm árin.
Uppbyggingarsjóður Suðurnesja
Umsóknir sem bárust voru samtals 67 talsins og hljóðuðu styrkbeiðnir upp á rúmlega 170 milljónir króna. Úthlutunarnefnd Uppbyggingarsjóðs úthlutaði 50 milljónum til 45 verkefna, en það er aukning um 7 verkefni sem fengu úthlutað 2024.
Skiptingin milli flokka er með þessum hætti:
- Stofn og rekstur fá úthlutað 8.500.000 kr.
- Menning og listir fá úthlutað 27.200.000 kr.
- Atvinnu- og nýsköpun fær úthlutað 14.300.000 kr.
Menningarverkefnið Óðurinn til gleðinnar er á tveggja ára samningi og fær nú úthlutað seinna ár samningsins eða kr. 2.000.000. Yfirlit yfir verkefnin er að finna í viðauka.
Áhersluverkefni Sóknaráætlunar 2025
Áhersluverkefni eru samningsbundin verkefni sem hafa beina skírskotun til sóknaráætlunar landshlutans. Þau eru samþykkt af stjórn SSS og þurfa að hljóta staðfestingu stýrihóps Stjórnarráðsins um byggðamál. Yfirlit yfir áhersluverkefni má sjá hér að neðan.
Verkefnið miðar að því að tryggja örugga og sjálfbæra ferðaþjónustu á Reykjanesi þrátt fyrir náttúruvá. Lögð er áhersla á skýra upplýsingamiðlun bæði þegar eldgos eru virk og á milli þeirra, uppbyggingu áfangastaðarins og samvinnu hagsmunaaðila. Framkvæmdaraðili er Markaðsstofa Reykjaness og verkefnið stendur 2025–2027. Heildarkostnaður er 10,5 m.kr.,þar af 3,5 m.kr. á ári úr sóknaráætlun.content.
Verkefnið styrkir fræðslustarf Reykjanes Geopark með vettvangsferðum fyrir kennara, fyrirlestrum og ráðstefnum um jarðfræði, sjálfbærni og náttúru. Markmiðið er að auka þekkingu kennara og skólafólks og efla samstarf skóla við Geopark og UNESCO. Framkvæmdaraðili er Reykjanes Geopark og verkefnið stendur 2025–2027. Heildarkostnaður er 18 m.kr., þar af 4 m.kr. á ári úr sóknaráætlun og 2 m.kr. mótframlag.
Verkefnið styrkir ímynd Reykjaness í kjölfar eldgosa í Grindavík með markaðsrannsóknum, góðum sögum af svæðinu, stafrænum miðlum og fræðsluefni fyrir íbúa, fjárfesta og ferða-menn. Markmiðið er að byggja upp traust og laða að fjárfestingar. Framkvæmdaraðili er Samband sveitarfélaga á Suðurnesjum og verkefnið stendur 2025–2027. Heildarkostnaður er 30 m.kr., þar af 10 m.kr. á ári úr sóknaráætlun.
Verkefnið þróar Reykjanes sem áfangastað fyrir myrkurferðaþjónustu með stjörnuskoðun og norðurljósaferðum, með sérstakri áherslu á Almyrkvann 2026. Felur í sér þróun ferðaleiða, áningastaða og markaðsefnis. Framkvæmdaraðili er Markaðsstofa Reykjaness og verkefnið stendur 2025–2026. Heildarkostnaður er 10 m.kr., þar af 3 m.kr. á ári úr sóknaráætlun og 2 m.kr. mótframlag frá Ferðamálastofu.
Verkefnið uppfærir áfangastaðaáætlun Reykjaness með sjálfbærni að leiðarljósi, þróar eftirlitkerfi fyrir ferðamannastaði og stofnar Markaðsráð og Sjálfbærniráð Reykjaness. Markmiðið er jafnvægi milli ferðaþjónustu, náttúruverndar og samfélagslegrar þróunar. Framkvæmdaraðili er Markaðsstofa Reykjaness og verkefnið stendur 2025–2027. Heildarkostnaður er 13 m.kr., þar af 7 m.kr. árið 2025 og 3 m.kr. hvort ár 2026–2027.
Verkefnið formgerir samstarf fyrirtækja á svæðinu með samstarfssamningum, siðareglum og sjálfbærnistefnu. Markaðsstofa Reykjaness, Reykjanes Geopark og Samband sveitarfélaga mynda kjarna samstarfsins. Framkvæmdaraðili er Markaðsstofa Reykjaness og verkefnið stendur 2025–2027. Heildarkostnaður er 6 m.kr., þar af 1,5 m.kr. á ári úr sóknaráætlun.
Verkefnið þróar sjálfbæra móttöku skemmtiferðaskipa á Reykjanesi með fræðslu fyrir íbúa, uppbyggingu gönguleiða frá höfnum, markaðssetningu og samstarfi við áfangastaði á Norðurslóðum. Sérstök áhersla er á þátttöku Grindvíkinga. Framkvæmdaraðili er Markaðsstofa Reykjaness og verkefnið stendur 2025–2027. Heildarkostnaður er 7,5 m.kr., þar af 2,5 m.kr. á ári úr sóknaráætlun.
Verkefnið greinir vinnuferðir íbúa á Suðurnesjum til og frá höfuðborgarsvæðinu m.t.t. menntunar, starfsgerða og launa. Samkvæmt gögnum frá 2018 sóttu 17% íbúa vinnu utan svæðisins. Niðurstöðurnar munu nýtast í stefnumótun fyrir atvinnulíf og samgöngur. Framkvæmdaraðili er Samband sveitarfélaga á Suðurnesjum og verkefnið stendur 2025–2026. Heildarkostnaður er 3 m.kr., þar af 1,5 m.kr. á ári úr sóknaráætlun.
Verkefnið setur upp mælaborð í PowerBI með víðtækri íbúagreiningu á Suðurnesjum — uppruna, fjölskyldugerð, tekjutegundum, menntunarstöðu og búsetutíma — til að styðja við áætlunargerð sveitarfélaga. Mælaborðið verður birt á heimasíðu Sambands sveitarfélaga. Framkvæmdaraðili er Samband sveitarfélaga á Suðurnesjum og verkefnið stendur 2025–2029. Heildarkostnaður er 5 m.kr., þar af 1 m.kr. á ári úr sóknaráætlun.
Grænn Iðngarður
Samband sveitarfélaga á Suðurnesjum og HS Orka undirrituðu samkomulag um grænan iðngarð á Reykjanestá í janúar. Verkefnið er hluti af Sóknaráætlun Suðurnesja og miðar að því að skilgreina hentuga umgjörð og samstarfsvettvang þeirra framleiðslufyrirtækja sem nýta auðlindastrauma beint frá Reykjanesvirkjun. Í samstarfi við sveitarfélög og stofnanir verður sérstaklega horft til þess hvaða kröfum fyrirtækin og samfélag þeirra þurfa að fullnægja til að uppfylla skilyrði um sjálfbærni í samræmi við stefnu stjórnvalda.
Ríkisstjórnarfundur á Suðurnesjum
Ríkisstjórnarfundur var haldinn í Reykjanesbæ 6. mars. Ríkisstjórnin fundaði einnig með fulltrúum sveitarfélaga á Suðurnesjum og heimsótti öryggissvæðið á Keflavíkurflugvelli.
Á fundi ríkisstjórnarinnar með fulltrúum Reykjanesbæjar, Suðurnesjabæjar, Sveitarfélagsins Voga og Sambands sveitarfélaga á Suðurnesjum var meðal annars rætt um skólamál og málefni barna með fjölþættan vanda, málefni Grindavíkur, uppbyggingu hjúkrunarheimila og fjárhagsstöðu sveitarfélaga.
Fundur með innviðaráðherra
Innviðaráðherra, Eyjólfur Ármannsson hélt íbúafund á Suðurnesjum 13. ágúst en tilgangur fundarherferðar var að kalla eftir sjónarmiðum íbúa og sveitarstjórnarfólks um málaflokka ráðuneytisins: samgöngur, sveitarstjórnar- og byggðamál, fjarskipti og stafræna innviði. Íbúum gafst tækifæri til að koma sjónarmiðum sínum á framfæri, sér í lagi vegna samgönguáætlunar sem lögð var fram um haustið.
Grindavík og náttúruvá
Eldsumbrot á Reykjanesi héldu áfram að valda óvissu sem reyndi á íbúa og viðbragðsaðila sem og stoðkerfið allt. Stuðningur og ráðgjöf verkefnastjóra SSS vegna Grindavíkur var samtals 432 klst á árinu.
Viðbótarframlag í Uppbyggingarsjóð Suðurnesja
Með 50 milljóna króna viðbótarframlagi í Sóknaráætlun Suðurnesja var veittur stuðningur til smærri atvinnurekenda í Grindavík. SSS annaðist verkefnastjórn og umsýslu úthlutunarinnar í gegnum Uppbyggingarsjóð Suðurnesja, en Heklan veitti umsækjendum ráðgjöf og stuðning. Alls hlutu 14 fyrirtæki styrki að fjárhæð 48,5 milljónir króna.
Sóknarsjóður Byggðastofnunar
Byggðastofnun úthlutaði styrkjum úr Sóknarsjóði til smærri fyrirtækja í Grindavík með það að markmiði að styðja við áframhaldandi rekstur þeirra. Samtals hlutu 33 fyrirtæki styrki að fjárhæð 130,4 milljónir króna. SSS sá um ráðgjöf til fyrirtækja og umsýslu endurgreiðslna vegna ráðgjafarkostnaðar.
Grindavík – samfélagsuppbygging og atvinnulíf
SSS hlaut styrk úr Byggðaáætlun fyrir verkefnið Endurreisn Grindavíkur og nærliggjandi svæða – Byggðaþróun og efling samfélags. Markmið verkefnisins var að styðja við endurreisn Grindavíkur með því að efla samfélag og atvinnulíf í samstarfi við sveitarfélagið.
Úr þeirri vinnu varð til verkefnið Grindavík – Saman í sókn, sem hófst formlega með staðarfundi þar sem fulltrúar 21 fyrirtækis komu saman til að móta sameiginlega framtíðarsýn fyrir atvinnulíf bæjarins.
Verkefnið er unnið af SSS í samstarfi við Markaðsstofu Reykjaness, Hekluna, Grindavíkurbæ og fleiri samstarfsaðila. Íslenski ferðaklasinn leiðir framkvæmd verkefnisins, sem er fjármagnað af Byggðaáætlun 2022–2036.
Atvinnuþróun og nýsköpun
Heklan, atvinnuþróunarfélag Suðurnesja, starfar samkvæmt samningi við Byggðastofnun um atvinnu- og byggðaþróun. Markmið samningsins er m.a. að skapa grundvöll samstarfs um byggðaþróun í samræmi við stefnu Alþingis í byggðamálum, með áherslu á búsetuskilyrði og samkeppnishæfni, nýsköpun- og atvinnuþróunarsamstarf.
Atvinnuráðgjöf
Samkvæmt lögum um Byggðastofnun sinnir stofnunin atvinnuráðgjöf á landsbyggðinni í samstarfi við landshlutasamtök, þar á meðal Samband sveitarfélaga á Suðurnesjum (SSS). Atvinnuráðgjafar veita einstaklingum, fyrirtækjum og sveitarfélögum ráðgjöf um meðal annars markaðsmál, vöruþróun, fjármögnun og erlend samskipti. Hver aðili á rétt á allt að 10 klukkustunda gjaldfrjálsri ráðgjöf. Áhersla var lögð á stuðning við frumkvöðla, nýsköpun, fyrirtæki í Grindavík og umsækjendur í Uppbyggingarsjóð.
Starfsmenn SSS og undirstofnana koma að atvinnuráðgjöf með ýmsum hætti og tengist hún fjölmörgum verkefnum og samstarfi við hagsmunaaðila á svæðinu.
Á árinu gerði SSS samstarfssamning við Eignarhaldsfélag Suðurnesja og sér um daglega umsýslu þess. Félagið gekk í gegnum endurskipulagningu og tók upp markaðsheitið Hviða fjárfestingarfélag, án þess að formlegt heiti eða kennitala breyttust. Samhliða var unnið að nýrri ásýnd, þar á meðal lógói og vefsíðu, til að styrkja ímynd félagsins og gera það sýnilegra fyrir frumkvöðla og fyrirtæki sem leita að fjármagni.
Stofnað var fagráð atvinnuráðgjafa sem kom saman á vinnustofu með það að markmiði að móta skýra starfsáætlun fyrir ráðið, en það er skipað fulltrúum allra landshlutasamtakanna utan höfuðborgarsvæðisins og Byggðastofnunar. Markmið fagráðsins er að efla tengsl ráðgjafa og vinna að auknu samstarfi í öllum landshlutum, samræma verklag, styrkja þjálfun og endurmenntun ráðgjafa og leita leiða til að auka sýnileika þjónustunnar.
Eldey frumkvöðlasetur opnaði á ný í glæsilegu skrifstofuhóteli sem opnað hefur verið að Keilisbraut 773 á Ásbrú. Þar gefst frumkvöðlum á Suðurnesjum kostur á að vinna að viðskiptahugmyndum sínum og þróa þær áfram í raunveruleg viðskiptatækifæri.
Fyrirtækjakönnun landshluta var framkvæmd á árinu en hún er unnin reglulega í samstarfi landshlutasamtaka. Niðurstöðurnar gefa góðar vísbendingar sem nýtast við þróun atvinnu á svæðinu.
Verkefnastjórar heimsækja reglulega fyrirtæki og fylgja eftir ráðgjöf. Hér má sjá mynd frá heimsókn í Græna iðngarða með fulltrúum Íslandsstofu.
FabLab Suðurnes
FabLab Suðurnes er starfrækt í Fjölbrautaskóla Suðurnesja. Mótframlag við stuðning ríkisins kemur frá SSS, Reykjanesbær og Miðstöð símenntunar á Suðurnesjum.
Árið 2025 var viðburðaríkt í starfsemi Fab Lab Suðurnes og einkenndist af vexti, aukinni aðsókn og breiðari þátttöku ólíkra hópa samfélagsins. Smiðjan hélt áfram að þróast sem mikilvægur vettvangur fyrir nýsköpun, tæknilæsi og skapandi lausnir þar sem einstaklingar, nemendur og samstarfsaðilar fá tækifæri til að hrinda hugmyndum sínum í framkvæmd.
Fundir, fræðsla og vinnustofur
Heklan stendur fyrir fræðslu til sprota og frumkvöðla. Fyrirlestraröðin Forvitnir frumkvöðlar sem er samstarfsverkefni atvinnuráðgjafa í landshlutum hélt áfram göngu sinni og þótti takast afar vel. Slíkt samstarf er bæði hagkvæmt og eykur á fjölbreytni fyrirlestra sem nýtast frumkvöðlum um land allt.
Nokkur námskeið og vinnustofur voru haldnar á svæðinu í tengslum við þau verkefni sem unnin voru á árinu. Mjög góð þátttaka var almennt á viðburðina og niðurstöður þeirra nýttar til frekari framþróunar í verkefnunum.
Startup Landið
Viðskiptahraðallinn Startup Landið var haldinn í fyrsta sinn en hann hófst 18. september og lauk með lokaviðburði á Akureyri 30. október þar sem þátttakendur kynntu verkefni sín.
Startup Landið er samstarfsverkefni atvinnuráðgjafa á landsvísu og fékk það styrk úr Lóunni, nýsköpunarsjóði landsbyggðarinnar til verkefnisins en að öðru leyti var það fjármagnað af landshlutasamtökunum og með vinnu ráðgjafa. Startup Landið veitir þátttakendum aðgang að sérfræðiráðgjöf, tengslaneti og möguleikum á fjármögnun. Markmiðið er að styðja við vöxt og þróun nýsköpunarverkefna sem eru komin af hugmyndastigi, hvort sem þau eru unnin af einstaklingum, sprotafyrirtækjum eða innan rótgróinna fyrirtækja.
Alls tóku tólf nýsköpunarteymi þátt en þar af voru tvö verkefni af Suðurnesjum.
Á myndinni má sjá þátttakendur í Startup Landinu 2025.
Starfsgreinakynning
Fimmtudaginn 26. september, fór fram starfsgreinakynning fyrir nemendur í 8. og 10. bekkjum á Suðurnesjum í Íþróttahúsinu í Keflavík. Kynningin var haldin af Sambandi sveitarfélaga á Suðurnesjum í samstarfi við Þekkingarsetur Suðurnesja, sem sá um skipulagningu og framkvæmd viðburðarins.
Fræðsla, menntun og fagþróun í ferðaþjónustu
Markaðsstofa Reykjaness kom að fjölbreyttum fræðsluverkefnum á árinu í samstarfi við Markaðsstofur landshlutanna, Hæfnisetur ferðaþjónustunnar, Íslenska ferðaklasann og fleiri samstarfsaðila. Áhersla var lögð á sjálfbærni, stafræna þróun, efnisgerð, upplifunarhönnun og eflingu fagmennsku innan greinarinnar.
Efling fræðslustarf Reykjanes Geopark
Þjónustusamningurinn milli GeoCamp Iceland, Reykjanes UNESCO Global Geopark og SSS í að efla fræðslu- og kynningarstarf á svæðinu. Markmiðið með samstarfinu er að auka sýnileika jarðvangsins, tengja skóla og samfélag betur við náttúruauðlindir svæðisins og styðja við kennslu í STEM greinum og sjálfbærni. Samningurinn er gerður til tveggja ára og lýkur í desember 2025. Miðað er við hálft stöðugildi sem skiptist á milli starfsfólks GeoCamp Iceland, allt eftir eðli verkefna. Sigrún Svafa Ólafsdóttir hefur leitt þetta samstarf og hefur unnið náið með starfsfólki innan SSS og forstöðumanni jarðvangsins.
Svæðisskipulag Suðurnesja
Svæðisskipulag Suðurnesja fundaði fimm sinnum á árinu 2025.
Fulltrúar í Svæðisskipulagi Suðurnesja eru eftirfarandi:
- Karl Alvarsson – Skipulagsnefnd Keflavíkurflugvallar (aðalfulltrúi)
- Steinþór Einarsson – Skipulagsnefnd Keflavíkurflugvallar (varafulltrúi)
- Lilja Ósk Sigmarsdóttir- Grindavíkurbær (aðalfulltrúi)
- Elísabet Bjarnadóttir – Grindavíkurbær (aðalfulltrúi)
- Ásrún Helga Kristinsdóttir – Grindavíkurbær (varafulltrúi)
- Hallfríður Hólmgrímsdóttir – Grindavíkurbær (varafulltrúi)
- Andri Rúnar Sigurðsson – Sveitarfélagið Vogar (aðalfulltrúi)
- Davíð Viðarsson – Sveitarfélagið Vogar (aðalfulltrúi)
- Inga Sigrún Baldursdóttir – Sveitarfélagið Vogar (varafulltrúi)
- Ingþór Guðmundsson – Sveitarfélagið Vogar (varafulltrúi)
- Einar Jón Pálsson – Suðurnesjabær (aðalfulltrúi) – varaformaður
- Jón Ben Einarsson – Suðurnesjabær (aðalfulltrúi)
- Gísli Jónatan Pálsson – Suðurnesjabær (varafulltrúi)
- Laufey Erlendsdóttir – Suðurnesjabær (varafulltrúi)
- Gunnar Kristinn Ottósson – Reykjanesbær (aðalfulltrúi)
- Eysteinn Eyjólfsson – Reykjanesbær (aðalfulltrúi) – formaður
- Guðlaugur H. Sigurjónsson – Reykjanesbær (varafulltrúi)
- Róbert J. Guðmundsson – Reykjanesbær (varafulltrúi)
- Jón B. Guðnason – Landhelgisgæsla Íslands (aðalfulltrúi)
- Hera Sól Harðardóttir – Landhelgisgæsla Íslands (varafulltrúi)
- Björn Ingi Edvaldsson – staðgengill forstjóra Isavia
Formaður nefndarinnar er Eysteinn Eyjólfsson en Einar Jón Pálsson er varaformaður.
Í ljósi jarðhræringa á Reykjanesskaganum var ákveðið að stofna vinnuhóp um varavatnsból og samþykkti nefndin að HS orka leiði verkefnið en Svæðisskipulagsnefnd Suðurnesja tilnefni einn aðila frá hverju sveitarfélagi í hópinn.
Uppbygging og umhverfismál
Á hverju ári funda starfsmenn MSR og RGP með fulltrúum umhverfis- og skipulagssviða og ferðamálafulltrúa sveitarfélaganna þar sem farið er yfir málefni sem snúa að þróun og uppbyggingu ferðamanna- og áningarstaða í landshlutanum. Unnið er árlega að uppfærslu á forgangslista uppbyggingar á ferðamannastöðum. Verkefnunum á listanum er ekki raðað eftir forgangsröð heldur hafa öll verkefni sama vægi. Fjórum nýjum verkefnum var bætt inn á listann. Viðkomandi sveitarfélög sendu inn umsóknir í framkvæmdasjóð ferðamannastaða vegna þessara verkefna fyrir úthlutun sjóðsins 2026. Reykjanes jarðvangur veitti ráðgjöf og aðstoð við undirbúning umsókna í þessum tilvikum. Reykjanes jarðvangur sendi umsókn í framkvæmdasjóð ferðamannastaða fyrir úthlutun 2025. Suðurnesjabær og Reykjanes Jarðvangur unnu saman að því að sækja um styrk í Framkvæmdasjóð ferðamannastaða vegna verkáfanga 1 í bættri aðkomu að Garðskaga. Verkefnið hlaut ekki styrk í úthlutun sjóðsins árið 2025.
Umferðarteljarar mæla fjölda bifreiða og meðalfjölda farþega við helstu áningarstaði Reykjanes jarðvangs, m.a. við Brimketil, Brú milli heimsálfa, Gunnuhver, Keili, Reykjanesvita, Garðskaga og Ósabotnaveg. Gögnin hafa reynst sveitarfélögunum og jarðvanginum mikilvæg við greiningu á heimsóknum og ferðahegðun gesta. Ferðamálastofa bætti jafnframt við teljurum við eldgosasvæðið við Fagradalsfjall og Brú milli heimsálfa. Á árinu hófst samtal við Ferðamálastofu um frekari gagnaöflun og nýja tækni við talningu ferðamanna. Ljóst er að endurnýjun talningarbúnaðar og endurskoðun talningarkerfis jarðvangsins er nauðsynleg. Verkefnið heldur áfram á nýju ári.
Reykjanes jarðvangur sendi Vegagerðinni tillögur um ný og uppfærð skilti á lykilstöðum á Reykjanesi, m.a. við Reykjanesvita, Gunnuhver og Brú milli heimsálfa. Markmiðið er skýrari vegvísun, betra aðgengi og uppfærsla á úreltum Geopark-merkingum. Einnig var óskað eftir lausn vegna fjarlægðra vegvísa við Brimketil. Erindið var sent í maí 2025 og hefur verið ítrekað án svara.
Á árinu 2025 komu fram auknar hættur vegna sprungna og jarðsigs við Valahnúk og Brú milli heimsálfa. Reykjanes jarðvangur vann með sveitarfélögum, lögreglu og Veðurstofu Íslands að vettvangsathugunum, áhættumati og hönnun nýrra öryggis- og varúðarmerkinga. Undirbúningur fyrir uppsetningu nýrra skilta og mögulegra lokana stendur nú yfir.
Öryggi, upplýsingar og eldgos
Eitt af áhersluverkefnum markaðsstofunnar er upplýsingagjöf og öryggi ferðamanna. Verkefnið miðar að því að veita upplýsingar um ferðamál, samgöngur og þjónustu á svæðinu, stuðla að öryggi ferðamanna og hlúa að forvörnum þannig að ferðamaðurinn geti ferðast um svæðið öruggur og upplýstur og upplifað svæðið á jákvæðan hátt. Inn í þetta verkefni tengjast önnur og fjölbreytt verkefni eins og uppbygging áningarstaða, efnisgerð á vefsíðu og verkefni tengd eldgosunum í Fagradalsfjalli og Sundhnjúksgígaröðinni. Markaðsstofan hefur verið í lykilhlutverki við miðlun upplýsinga vegna eldgosa og lokana, þróaði ferla fyrir öryggisskilti og vann með Safetravel, Almannavörnum, Lögreglustjóranum á Suðurnesjum, Ferðamálastofu, Íslandsstofu og fleirum að bættri upplýsingagjöf til ferðamanna og á áningarstöðum.
Meðal verkefna sem var unnið að eru:
Áhersluverkefnið Ferðaþjónusta og náttúruvá á Reykjanesi varð einn af lykilþáttum í starfsemi Markaðsstofu Reykjaness árið 2025. Verkefnið snýr að þróun verkferla, upplýsingamiðlunar og samstarfs vegna náttúruvár og ferðamennsku á virku eldsumbrotasvæði. Sérstök áhersla var lögð á samræmda upplýsingagjöf, þróun stafrænna lausna og samstarf við viðbragðsaðila, sveitarfélög og ferðaþjónustu.
Verkefnið styður bæði við öryggi gesta og uppbyggingu trausts gagnvart Reykjanesi sem öruggum og vel undirbúnum áfangastað þrátt fyrir áframhaldandi náttúruvá.
Jarðhræringar í og við Grindavík hafa litað alla starfsemi SSS og undirstofnana, þar sem flestir starfsmenn hafa komið að verkefnum sem miða að því aðstoða og létta undir verkefnum Grindavíkurbæjar og starfsmanna þeirra; hvort sem það hefur verið að aðstoða atvinnuteymi Grindavíkur, uppbyggingu í og við eldgosið í Fagradalsfjalli, kortleggja atvinnuhúsnæði eða annað.
Vegna jarðhræringanna hafa markaðsstofan og Reykjanes jarðvangur unnið að því að tryggja góðar upplýsingar til ferðamanna og ferðaskrifstofa um aðstæður á svæðinu, hvort sem það er gos í gangi eða á milli gosa. Mikil aðsókn hefur verið á svæðið vegna jarðhræringanna og því mikilvægt að gestir og ferðaþjónustuaðilar geti undirbúið sig áður en farið er af stað inn á svæðið. Vefurinn visitreykjanes.is hefur verið mikilvægur vettvangur slíkrar upplýsingagjafar og voru tæplega 500 þúsund notendur sem heimsóttu hann á árinu og mun fleiri sem nýttu sér kortagögn yfir gönguleiðir um gosstöðvarnar.
Milli tíðra eldgosa við Sundhnúksgíga skapast mikill áhugi ferðamanna á að skoða gosið og komast nærri hraunjaðrinum. Unnið var reglulega að því að koma á og þróa útsýnisstað við nýtt hraunið nærri Grindavíkurvegi til að létta á þeirri þörf gesta að stöðva bifreiðar á veginum og skapa þannig hættu í umferðinni. Einnig þótti ráðlagt að reyna að koma í veg fyrir að gestir færu að ráðast í lengri göngur að hraunjaðrinum og þannig ganga yfir svæði sem ekki var talið öruggt yfirferðar.
Starfsmenn markaðsstofunnar vinna með erlendum fjölmiðlum allt árið, hvort sem það er við einfaldar fyrirspurnir eða skipulagningu stærri ferða um svæðið. Samstarf við Íslandsstofu og Ferðamálastofu hefur þar skipt miklu máli, sérstaklega þegar kemur að áhuga þeirra á Grindavík, jarðhræringum og eldgosum í Fagradalsfjalli. Starfsmenn markaðsstofunnar hafa m.a. komið að uppsetningu fjölmiðlaseturs vegna eldgosanna, svörun almennra fyrirspurna og leit að viðmælendum.